4-anyos nga ubing, naisebba ti bagina iti agburburek a danum

LAOAG CITY - Naiget a mabanbantayan ti
kasasaad ti uppat ti tawen na nga ubing a ni Princess Domingo kalpasan a
nagsagaba iti 4th degree burns gapu iti pannakaisebba na iti agburburek
a danum.

Arigna saan nga ammo dagiti nagannak a
da Larry ken Maritess Domingo ti aramiden da apaman a nakita da ti ubing
a naisebba ti sibubukel a bagina iti sinublan a naglaon ti agburburek a
danum nga usaren dagiti agparti iti baboy iti maysa a graduation party
iti Brgy. Talingaan, Laoag City.

Dagus a naitaray iti kaasitgan nga
hospital ti ubing ken naiyakar iti Mariano Marcos Memorial Hospital and
Medical Center gapu iti nakaro a sinagaba ti bagina.

Awan sarday ti panagsangit ti ubing
kabayatan a maitartaray iti hospital gapu iti apges ken ut-ot ti
nakulanitan a bagi na ken makilablaban ita iti infection.

Segun kadagiti nakasaksi iti insidente,
agay-ayam ti ubing a nagsansanud agingga a nadanon na ti ayan ti
sinublan a naglaon iti agburburek a danum.

Awan pay rakurak dagiti agasawa a
Domingo iti nakapay-an ti anak da nangruna iti ina a mangay-aywan
kenkuana idi mapasamak ti insidente.




orig. link:
[You must be registered and logged in to see this link.]